Tuesday, July 27, 2021

ELATED IN EUROPE/యూరప్ ట్రిప్

 

 Europe trip...16th-26th July 2016 (All Indian Medical Association) విమానం మిలన్(Milan) ఎయిర్ పోర్ట్ లో దిగింది మొదలు అల్పాహారం అన్ని హోటల్స్లో అతిగా ఆరగించామనే చెప్పాలి. ఇటలీ(Italy) వినైస్(Venice) ద్వీపంలో విహారయాత్రకి ముందు విందుభోజనం మొదలుకుని పదిరోజులు సుష్టిగా టైంకి భోజనానికి ఏమాత్రం లోటు జరుగలేదు అని చెప్పడానికి పెరిగిన మా బరువులే నిదర్శనం. చెప్పడం మరిచానండి...వినైస్ లో బోటు షికారు బాగుంది. ఫ్లోరెన్స్(Florence) నుండి బయలుదేరి రోం(Rome) నగర రోడ్లపై వాటికన్(Vatican) సిటీ అందాలను గాంచి పిసా(Pisa) టవర్ పైకి ఎక్కకనే పై మెరుగులు చూసి పయనించాము. బ్లాక్ ఫారెస్ట్, జర్మనీ(Germany)లో సుధీర్ఘ ప్రయాణం తరువాత టిట్లిస్(Titlis) మంచుపర్వత అందాలతో మనసు ఘనీభవించింది. స్విజర్లాండ్(Switzerland)లో మూడురోజులు ఉన్నా ఇంకా ఉండాలనిపించే ప్రకృతి అందాలు దానికే సొంతం. అయినా తప్పని పయనం కదా...డిజాన్(Dijon) వీధులగుండా పారిస్(Paris)కి పయనం. ఫ్రాన్స్(France) పాష్ హోటల్ నోవాటెల్ లో మకాం. రెండురోజులు పారిస్ నగర అందాలు, ఈఫెల్(Eiffel) టవర్ ఎక్కిన ఆనందాలని మూట గట్టుకుని బెల్జియం(Belgium)కి పయనం. బ్రుసెల్స్(Brussels)లో కట్టడాలు చూసిన పిమ్మట నెదర్లాండ్స్(Netherlands) ఆంస్టెర్డాం(Amsterdam)కు చేరుకుని మరునాడు మడురొడం(Madurodam) పార్క్ చూసి ఫాంక్ఫర్ట్(Frankfurt) ఎయిర్ పోర్ట్ లో విమానం ఎక్కి హైదరాబాద్(Hyderabad) చేరుకోవడంతో యూరప్(Europe) టూర్ ముగిసింది.

 

Wednesday, July 7, 2021

!!నువ్వే ప్రత్యేకం!!

నీలో దాగున్న శక్తిని నువ్వే తెలుసుకోవాలి
నీ లోపాలు తెలుపడానికి జనం ఉన్నారుగా

ఆశయాలను కలలను ఎత్తుగా ఊహించుకో
అవమానించి క్రిందకు లాగే లోకులున్నారుగా

జీవితం సాగాలంటే అడుగు ముందుకువేయి
వెనక్కి లాగడానికి బోలెడుమంది ఉన్నారుగా

నీ అభిరుచికి అనువైన ఆజ్యం నువ్వే పోసుకో
నిన్ను రగిలించి మండించ ప్రజలు ఉన్నారుగా

ఉండాలి అనుకుంటే మధురజ్ఞాపకమై మిగిలిపో
నిందలేసి పుకారుపుట్టించే మానవులున్నారుగా

ప్రేమించాలనుకుంటే నిన్ను నువ్వు ప్రేమించుకో
ద్వేషించడానికి దునియా మొత్తం వేచిఉన్నదిగా

నిన్ను నువ్వు నమ్ముకుని ఏదైనా సాధించుకో
సందేహించి నిరుత్సాహ పరిచే వ్యక్తులున్నారుగా

ప్రత్యేకమైన గుర్తింపు సృష్టించుకుని అలాసాగిపో
మందలా ముందుకు సాగిపోయే గుంపు ఉందిగా