!!అందీఅందక!!

నింగిలోని జాబిలివై నాకు అందకుండా నీవుంటే
నీ రూపాన్ని గుండెల్లో దాచుకుని ఆనందిస్తున్నా.

అక్కడెక్కడో ఒయాసిస్సులా కనీకనబడక నీవుంటే
గుండెనిండా ఆశలను నింపుకుని నేను బ్రతికేస్తున్నా.

మదినిండా ప్రేమతో కురియని మేఘంలా నీవుంటే
నీ జ్ఞాపకాల సెగలతో ఆవిరైన ఆశలతో ఎదురుచూస్తున్నా.

సంతోషాల సెలఏరులా నీవు పొంగి ప్రవహిస్తుంటే
నిలువని నా ప్రేమతో ఆనకట్ట వేసి ఆపాలనుకుంటున్నా.

ప్రతిక్షణం నీవు లేవన్న లోటు నన్ను ఏడిపిస్తుంటే
మరచిపోవాలనుకుంటూనే మరల మరల నీ పేరే జపిస్తున్నా.

నా ప్రేమ

ప్రేమని వ్యాపారంగా చూసి

లాభనష్టాలంటూ బేరీజు వేసి

మనసిచ్చిపుచ్చుకునే సంతలో

అమ్ముడుపోయే వాళ్ళు కోకొల్లలు

పో....పోయి అక్కడ కొనుక్కో ప్రేమని

నా ప్రేమని కొనే కాసులు కాదు కదా

ఖరీదు కట్టే కలేజా కూడా నీకు లేదు!

నా ప్రేమ రుసుముకి కాదు దక్కేది....

                                         నేను రుణమున్న వారికే అది చిక్కేది!!

తీరని ఋణం

మెల్లగసాగు జీవితమా ఋణాలు ఇంకా బాకీఉన్నాయి
అసలుకంటే ముందు వడ్డీ ఇమ్మని అడుగుతున్నాయి
హడావిడిగా సాగి కొన్ని తీరి మరిన్ని మిగిలి ఉన్నాయి

నెమ్మదిగానడు జీవితమా భాధ్యతలింకా మిగిలున్నాయి
భాధలే దించి బరువు తగ్గించమంటూ బంధాలు కోరాయి
అలుకలే తీర్చి ఏడ్చేవారిని నవ్వించమని అంటున్నాయి

కుదురుగా పయనించు జీవితమా పనులింకా ఉన్నాయి
తీరని కోరికలు ఇంకా బాకాయీలంటూ గోలచేస్తున్నాయి
విరిగి అతికిన మమతలు గాయం పూడ్చమంటున్నాయి

నడుస్తూ వెళ్ళు జీవితమా నీవెనుకే నా అడుగులుంటాయి
నా ఊపిరిపై హక్కు ఉన్నవారితో ఊసులాడాల్సి ఉన్నాయి
మెల్లగా సాగిపోవే జీవితమా ఆశలు ఇంకా మిగిలున్నాయి

కలలు

స్వప్నాల్లో జీవించడమే బాగుంది
నిద్రని పెట్టుబడిగా పెడితేనే చాలని
కళ్ళతో ఆశల అంబరాన్ని తాకించి
నిదురే నాకు నిజమైన నేస్తమైంది

నెరవేరక నిరాశపరిచే నిజాలకన్నా
బూటకపు భ్రాంతియే భలేబాగుంది
అనురాగమంటూ ఆస్తులేం అడగక
ఊహల్ని వీలునామాగా అందించింది

అక్కునచేరి అవసరం తీర్చమననని
కావలసింది కనులార కలగనమంది
గతాన్ని కొనేంత గొప్పదాన్ని కాదని
గుర్తించి గుణపాఠమే నేర్చుకోమంది

!!మార్పెందుకో!!

ఇంతలోనే ఈ మార్పు ఎందుకో!
వేలుపట్టుకుని నడిచిన చేతివేళ్ళే
వేలెత్తి వంకలు చూపుతున్నాయి

ఇంతలా తెలియని దూరమేలనో!
కరచాలం అంటూ కలిపిన చేతులే
కాదు పొమ్మని కసురుతున్నాయి

ఇప్పుడు ఎందుకని ఈ అలజడో!
నాడు అంతంలేని మాటల ఆతృతే
నేడు మాటలు వెతుకుతున్నాయి

ఇవాళ ఈ వ్యధభారమెలా తీరునో!
నాటి పరిచయ పులకరింతజల్లులే
పైనతడిసి పరాయిగా తోస్తున్నాయి