!!పైపైన!!

మనుషులు వివిధ మార్గాల్లో మనుగడసాగిస్తారు
బ్రతికేస్తూ దానిగురించి మాట్లాడేవారు కొందరు
మౌనంగా అన్నీభరించి బ్రతికేవారు ఇంకొందరు
కొద్దిమందే బ్రతుకుతూ అదర్శమార్గం చూపేరు!
 
ప్రతీఒక్కరూ ఏదొక సమస్యను ఎదుర్కొంటారు
ఎవ్వరూ తీర్పు ఇవ్వకున్నా శిక్ష అనుభవిస్తారు
చూసేవారికి ఏ బాధలూ లేనివారిగా కనిపిస్తారు
కొద్దిమందే ఒడిదుడుకుల్లో నిశ్చింతగా ఉంటారు!
 
కాబట్టి పైపైన చూసేసి బేరీజు వేయకండి మీరు
ఎవరికి ఏం ఎరుక ఎవరెంత కష్టపడుతున్నారు
ఒకచోట ప్రశాంతంగా కనబడే సముద్రపు నీరు
వేరోచోట తుఫాను సృష్టిస్తుందని గ్రహించగలరు!