!!దమ్ము!!

దాసోహమై వంగి దణ్ణాలెట్టి దేహీ అంటే 
ధీనంగా చూసి కుక్కలా ఛీకొట్టే లోకం..
అన్నింటా ధీరులై దర్జా ధీమాలతో ఉంటే
సింహమని శిరస్సు వంచి సలాం చేస్తుంది!

ధరించిన వస్త్రాల్లో దాగిలేదు దమ్ము అనేది
మనపై మనకున్న నమ్మకమే మన బలం..
వేసుకున్న వస్త్రాలనిబట్టి హోదా పెరిగేటట్లైతే
తెల్లని గుడ్డలో చుట్టబడ్డ శవం కూడా లేచి 
సింహాసనం పై కూర్చుని చిందులువేస్తుంది!

!!సద్వినియోగం!!

సాధించాలన్న దీక్ష పట్టుదల ఉన్నవాళ్ళు..ఆలస్యంగానైనా అనుకున్నది సాధించి చూపిస్తారు.. అంతేకానీ వంకలు పట్టుకుని వేలాడరు! మనం వేసిన ముగ్గు చెరిగిపోతే కొంచెం శ్రమపడితే.. దానికి మించింది మరోటి వేసుకోవచ్చు! మనకంటే బెటర్ అనుకుని మనల్ని వదిలేసి వెళ్ళినవాళ్ళు అంతకంటే బెటర్ అనిపిస్తే.. వాళ్ళనీ వదిలేసి వెళ్ళిపోతారు! అంతే కాదు వాళ్ళకంటే బెస్ట్ వాళ్ళని ఎంచుకునే అవకాశాన్ని.. మనకి వాళ్ళే ఇచ్చి మరీ వెళ్తారు! తెలిసిన వారు అవకాశాన్ని వాడుకుంటే తెలియవారు తెలివిలేక.. సద్వినియోగం చేసుకోవడం రాక ఏడుస్తారు!

!!పండుగ శుభాకాంక్షలు!!

అందరికీ భోగి, సంక్రాంతి, కనుమ పండుగ శుభాకాంక్షలు  

భోగిమంటల్లో పీడలన్నీ మాయం 

సంక్రాంతి తీసుకురావాలి సంతోషం

కనుమ తీర్చాలి అందరి అభీష్టం   

మనదేశం కావాలి శాంతి నిలయం!

!!ఎవరికి వారు!!

ప్రతీ సాగరానికి రెండు తీరాలు ఉన్నట్లుగా..

ప్రతీ మనిషికీ రెండు నాలుకలు ఉంటాయేమో

లోన ఒకటనుకుని పైకి ఒకటి మాట్లాడతారు!

మనసుకి నచ్చినవారు మనతో లేకపోతేనేం..

జ్ఞాపకాల్లో మనతో కలసి మెదులు తుంటారు!

జీవితాంతం ఎవరోకరు తోడుండాలని ఆశించకు..

ఎవరైన ఒంటరిగా ఉన్నప్పుడే తలుచుకుంటారు!

!!మార్పు!!

నేను హ్యాపీగానే ఫీల్ అవుతాను.. నా గురించి చర్చించుకుంటున్నారంటే చెడుగా నాపై చెప్పుకుంటే మాత్రం ఏం నన్ను తలచుకుంటున్నారని అనుకుంటాను! ఎవరన్నారు "నేచర్" మరియు "సిగ్నేచర్" ఎప్పుడూ మారవు మరియూ మార్చలేమని!? చేతివేళ్ళకి గాయమైతే సిగ్నేచర్ మారుతుంది మనసుకి గాయమైతే మనిషి నేచర్ మారుతుంది.