!!అమ్మకానికి అన్నీ!!

నీరు అమ్ముడైపోతుంది, ఋతువులూ అమ్ముడై పోవునేమో
నేల అమ్ముడైపోయింది, అంబరం కూడా అంగడికి చేరునేమో
చంద్రమండలంలో అడుగేసి గజానికో రేటుకట్టి అమ్ముతున్నారు
సూర్యరశ్మిని కూడా సంచులు కట్టి సంతలో విక్రయించేస్తారేమో!

అమ్ముడు కానిది అంటూ ఏదీ లేదు అమ్మతనంతో పాటుగా
స్వార్థం ఎలాగో అమ్ముడైపోయింది, ధర్మం ఆ దారే పట్టిందేమో
అనుబంధాలూ ఆప్యాయతలూ తలొక రేటుకీ అమ్ముడైనాయి
కొన్నాళ్ళకి మనిషి తననితానే ముక్కలుగా అమ్ముకుంటాడేమో!

ప్రతీ పనీ పైసల కోసం, నేతలేమో పదవుల కోసం అమ్ముడైనారు
భయం వేస్తుంది, క్రమేణా దేశమే అమ్ముడు అయిపోతుందేమో
నేడు చనిపోయిన శవం కూడా రెప్పలు మూయకనే చూస్తుంది
త్వరలో శవమే, స్మశానంలో తనని పాతిన స్థలం అమ్మునేమో!