!!వెన్నుపోటు!!

కొన్నాళ్ళుగా వెనుక వీపులో నొప్పిగా ఉంటుందని  

డాక్టర్ దగ్గరకెళితే వెన్నెముకల్లో ఎడమెక్కువైంది..

ఇకపై వంగి ఉండమాకు అంటూ సలహా ఇచ్చారు

మొదటిసారిగా ఒకరి నోటివెంట ఆ మాట వినగానే

తెలియకుండానే నవ్వూ ఏడుపూ కలిపి వచ్చాయి!

కలవరంతో కళ్ళు కలత ఆలోచనలని ప్రశ్నించాయి!   

చిన్నప్పటి నుండీ అమ్మా నాన్నా పెద్దలూ వృద్ధులూ 

సమాజం సైతం ఆడదానివి నువ్వు..వంగి ఉండమని

స్త్రీ..ఎంత వంగుంటే ఆ గృహమంత సవ్యంగా సాగేనంటే 

అలా వంగిపోయిన నాలోనూ వెన్నుపూస ఉందాని!?

ఇలా వంగి ఉన్నందుకే వెన్నుపోటూ, ఆ శూన్యతాని!      

ఇప్పుడు వంగొద్దంటే నన్నునేను ప్రశ్నించుకుంటున్నాను

బాల్యం నుంచీ అయిష్టాల్ని ఇష్టాలుగా మార్చుకున్నానని 

ఇప్పటికే ఎన్నో కోరికలు కలలూ జారిపోయాయి కదాని

జీవితం నన్ను ఇంకేం నిలబెట్టాలిలే అని సమాధానపడి

సర్దుకునిపోయి సాగవల్సిందే జీవితమని నవ్వుతున్నాను!