!!నా అస్తిత్వాక్షరాలు!!

వ్రాయాలనుకుంటాను అందమైన రీతిలో
భావాలకి భాష, అక్షరాలు నేర్పాలని కాదు
ఆత్మతృప్తినిచ్చే అక్షరాలకి రూపమివ్వాలని

వ్రాయాలనుకుంటాను అద్భుతమైన శైలిలో
భాషపై అత్యంత పటుత్వము ఉన్నదని కాదు
భావవ్యక్తీకరణపై అక్షరాలకి వల్లమాలిన ప్రేమని

వ్రాయాలనుకుంటాను ఆలోచనలన్నీ కవితలో
భావుకతలకి కల్పనలు అద్దే కవయిత్రినని కాదు
పక్వపరిణితి చెందేలా మనసుకి పదును పెట్టాలని

వ్రాయాలనుకుంటాను ఆవేదనవంపి అక్షరమూసలో
భాంధవ్య బంధాలు భాధ్యతలు భాధించాయని కాదు
మదిని, మెదడుని ఒకేతాటిపై నడిపించేలా చేయాలని

వ్రాయాలనుకుంటాను అమూల్యాక్షరాలని పదమాలలో
భవసాగరంలో ఎదురీది గెలుపొందాలన్న స్వార్థం కాదు
నా అస్తిత్వానికి పునాదిగా అక్షరాలని అమర్చుకోవాలని