ఏ ఏడాతికాయాడాదే ఆహా హో అనుకుంటూ
అంతా మంచి జరుగునని గెంతులేసుకుంటూ
గడచిన కాలం తిరిగిరాదని వచ్చేది గొప్పదని
జీవితమంటే షడ్రుచుల సమ్మేళనమని సర్దుకుని
సంకలెగరేసి సంబరపడినా కాదని చతికిలబడినా
పంచాంగ పారాయణం చేసి పళ్ళు ఇకిలించినా
జరిగేది జరుగకా మానదు బ్రతుకు మారిపోదు
కోయిల కూసిందని కాకి అరవడం మానేయదు!
బ్రతకడానికి తినే తిండిలో రుచులు తగ్గినా తిని
కారాన్ని మమకారం నుంచి తీసి తీపిని పెంచు
చేదు చేబదులిచ్చి ఉప్పును నిప్పుగా మార్చకు
మాటలకు పులుపు చేర్చి వగరుతో పొగరుబోకు
ప్రతి మనిషీ....నిర్మల నిశ్చల సమున్నతమై
సాటి వారిపై సానుభూతి ఉంచి మసలితే చాలు
ప్రకృతి ప్రతిరోజూ పులకరించి వసంతాన్ని పంచు
అది చూసి ఇంటింటా పండుగ వద్దన్నా నర్తించు!
హేవిళంబి తెలుగు సంవత్సరమా నీకు స్వాగతం..
